Código de conduta
Un día con IA · 21 de novembro de 2026 · Cidade das TIC, A Coruña
Un día con IA é unha xornada para aprender, compartir e coñecer xente. Queremos que todas as persoas que veñan —sexa cal sexa a súa experiencia, perfil técnico ou procedencia— se sintan benvidas, seguras e cómodas. Este código aplícase a asistentes, poñentes, organización, empresas colaboradoras e persoal do local, durante toda a xornada e tamén nos canais online do evento.
1. Que esperamos de ti
- Trata con respecto e amabilidade a todas as persoas, aínda que o ambiente sexa informal a túa actuación pa ra os demáis debe ser educada.
- Escoita e deixa que a outra persoa remate de falar. Non hai preguntas «tontas».
- Usa unha linguaxe inclusiva; mide as bromas, que poden non ter graza para quen as recibe.
- Respecta o espazo persoal e pregunta antes de tocar, fotografar ou gravar a alguén.
- Respecta as normas do local e o traballo de quen o coida.
- Se ves que alguén o está pasando mal, avisa á organización.
2. Que non toleramos
- Insultos, comentarios ou bromas sexistas, racistas, homófobas, tránsfobas, capacitistas ou que discriminen por calquera outra característica persoal.
- Acoso, intimidación, persecución, atención sexual non desexada ou contacto físico non consentido.
- Agresións físicas ou ameazas de calquera tipo.
- Fotografar ou gravar a persoas que pediron non facelo, ou publicar imaxes que as poñan en evidencia.
- Interromper de forma reiterada, monopolizar a palabra ou boicotear charlas e conversas.
- Contido sexualmente explícito ou violento en charlas, diapositivas, demos ou stands.
- Calquera conduta que razoablemente poida entenderse como hostil, humillante ou que faga sentir inseguro a alguén.
Estas normas aplícanse tamén ás charlas, ás ferramentas de IA e aos exemplos que se amosen nelas: non valen dobres raseiros por ser «código», «datos» ou «un modelo».
3. Que facer se hai un problema
Se alguén te molesta, ou ves que molestan a outra persoa, di algo á organización canto antes. Non fai falta que esteas seguro/a de que «é para tanto».
- No evento: fala con calquera persoa da organización ou na mesa de acreditación.
- Por correo: escríbenos a asociacion@cascarillatech.org, tamén despois do evento.
Tratamos cada caso con discreción e só compartimos a información imprescindible para resolvelo. Se o prefires, podes pedir que a denuncia sexa confidencial. Se hai perigo inmediato ou un delito, chama ao 112.
4. Consecuencias
A organización poderá tomar as medidas que considere necesarias, entre elas:
- Falar coa persoa infractora e pedirlle que cambie de actitude.
- Pedirlle que abandone unha charla, un espazo ou o evento.
- Expulsala do evento sen dereito a reembolso da entrada.
- Vetar a súa participación en futuros eventos de Cascarilla Tech e Coruña JUG.
- Nos casos graves, informar o local e, se procede, as autoridades.
As decisións da organización durante o evento son finais, sen prexuízo de que poidas escribirnos despois para que revisemos o caso.
5. Quen o organiza
Un día con IA organízano Cascarilla Tech e Coruña JUG, coa colaboración de empresas patrocinadoras e do local que nos acolle.
6. Revisión
Este código pode mellorar co tempo. Calquera cambio publicarase nesta mesma páxina. Se cres que lle falta algo, cóntanolo.